अर्चना चव्हाण विशेष/प्रतिनिधी : केंद्रीय लोकसेवा आयोगाने, भारतीय वन सेवा (UPSC IFS Mains 2021) मुख्य परीक्षेचे वेळापत्रक जाहीर केले आहे. आयोगाने अधिकृत वेबसाइट upsc.gov.in वर हे शेड्युल जारी केले आहे. यानुसार, यूपीएससी मेन्स परीक्षा (२०२१) २७ फेब्रुवारी ते ६ मार्च या कालावधीत आयोजित केली जाणार आहे. ही परीक्षा दोन सत्रात होणार आहे. पहिले सत्र सकाळी ९ ते दुपारी १२ पर्यंत आणि दुसरं सत्र दुपारी २ ते सायंकाळी ५ वाजेपर्यंत असेल. ज्या उमेदवारांनी पूर्व परीक्षा उत्तीर्ण केली आहे, ते मुख्य परीक्षेसाठी पात्र आहेत.
UPSC IFS Mains २०२१ परीक्षेच्या उमेदवारांना आवाहन करण्यात येतं की त्यांनी तारखा नोंदवून ठेवाव्यात आणि त्यानुसार परीक्षेची तयारी करावी. भारतीय वन सेवा (mains) परीक्षा (लेखी परीक्षा आणि मुलाखती) भारतीय वन सेवेसाठी उमेदवारांनी निवड करण्यासाठी आयोजित करण्यात येते. लेखी परीक्षेच्या दुसऱ्या भागातील उपभागात (सेक्शन बी) ठराविक विषयांतील पारंपरिक निबंध प्रकारातले सहा पेपरचा समावेश असेल.
या केंद्रांवर होणार परीक्षा-
मुख्य परीक्षा भोपाळ, चेन्नई, दिल्ली, दिसपुर (गुवाहाटी), हैदराबाद, कोलकाता, लखनऊ, नागपूर, पोर्ट ब्लेयर आणि शिमला केंद्रांवर आयोजित केली जाईल. कोणत्याही प्रकारच्या समस्येसाठी उमेदवार आयोगा द्वारे जारी करण्यात आलेल्या हेल्पलाइन नंबर ०११-२३३८५२७१ वर संपर्क साधू शकतात. ई-मेल द्वारे webcell-upsc@nic.in येथेही संपर्क साधता येईल.
मेन्स परीक्षेत उत्तीर्ण होणाऱ्या उमेदवारांना मुलाखतीसाठी बोलावले जाईल. उमेदवारांची संख्या उपलब्ध संख्येच्या दुप्पट असेल. मुलाखत ३०० गुणांची असेल. उमेदवारांच्या मुख्य परीक्षा आणि मुलाखतीतील गुणांच्या आधारे अंतिम निकाल तयार केला जाईल. परीक्षेसाठी अॅडमिट कार्डही लवकरच जारी केले जाईल. अधिक माहितीसाठी उमेदवारांनी आयोगाचे संकेतस्थळ पाहावे.