कोल्हापूर/प्रतिनिधी : कोल्हापूर शहरासह जिल्ह्यात शुक्रवारी उन्हाचा तडाखा वाढला. अंगाची लाहीलाही करणार्या उन्हाच्या झळांनी नागरिक अक्षरश: हैराण होऊन गेले. शहराचा पारा ४० अंशांकडे चालला आहे. आज ३९.५ अंश इतक्या कमाल तापमानाची नोंद झाली. यंदाच्या उन्हाळ्यातील हे आजवरचे सर्वाधिक तापमान आहे. चार दिवसांपासून तापमानात वाढ होत आहे. कमाल आणि किमान तापमानात वाढ झाल्याने हवेत उष्मा जाणवत आहे. गेल्या दोन दिवसांपासून सरासरी तापमानापेक्षा तीन अंशांनी पारा वाढला आहे. आजही तापमानातील वाढ कायम राहिली. सकाळपासूनच हवेत उष्मा होता. दुपारी तर उन्हाचे चटके अधिक जाणवत होते. अंगातून घामाच्या धारा निघाव्यात इतकी तीव्रता होती.दुपारपासून वाढलेल्या उकाड्याने नागरिक अक्षरश: हैराण झाले होते. यामुळे कार्यालये, दुकाने आदींसह घराघरांत सकाळी अकरा वाजल्यापासूनच फॅन, एसी सुरू झाले होते. दुपारी वातावरण ढगाळ झाले. शहराच्या पश्चिमेकडील उपनगर परिसरात तर तीनच्या सुमारास मोठे ढग आले. यामुळे वादळी पाऊस होईल, अशी शक्यता होती. मात्र, काही वेळाने वातावरण निरभ्र झाले.
उन्हाच्या झळांनी कोल्हापूरकर हैराण : पारा ४० अंशांकडे..!
