0
0
कोल्हापूर/प्रतिनिधी : आज अक्षय्य तृतीया, करवीरनिवासिनी जगदंबेचा दोलोत्सव. अर्थातच जगदंबा रजत सिंहासनाधिष्ठित झोपाळ्यावर आरूढ होऊन अगदी गौरी प्रमाणे झोके घेते. माध्यान्ह काळ आणि सुर्यास्ताच्या पुर्वसमयी चोपदारांच्या ललकारीने, हवालदार, रोशनाईक व इतर मानकऱ्यांसोबत, सनई-ताशा अशा मंगल वाद्यांसह जगदंबेची उत्सवमूर्ती गर्भगृहातुन गरुड मंडपाकडे प्रस्थान ठेवते. गरुड मंडपामध्ये रजत सिंहासनाधिष्ठित हिंदोळ्यावर विराजमान झाल्यानंतर उत्सवमूर्तीची विविध वस्त्र-अलंकारयुक्त अलंकार पुजा बांधली जाते. सोबत चौऱ्या, मोर्चेल, अब्दागिरी सुध्दा विराजमान होतात. विविध पाना-फुलांनी झोपाळा आणि गरुड मंडप सजवला जातो, आणि चोपदारांच्या ललकारीने चालु होतो जगदंबेचा दोलोत्सव. चोपदार देवीला अखंड झोके देत असतात. करवीरातील सुहासिनी जगदंबेला हळद-कुंकू व इतर सौभाग्य अलंकार प्रदान करण्यासाठी गरुड मंडपामध्ये आवर्जुन हजेरी लावतात. कैरीचे पन्हे आणि आंबेडाळ सर्वांना देण्याची रेलचेल चालु असते. रात्री ८:०० च्या सुमारास उत्सवमूर्ती चोपदारांच्या ललकारीने गर्भगृहाकडे प्रस्थान ठेवते.नंतर नेहमीप्रमाणे शेजारती होते.आणि अशा रीतीने जगदंबेचा दोलोत्सव संपन्न होतो परंतु जगदंबा आपल्या भक्तांच्या भावविश्वातील हिंदोळ्यावर अखंड विराजमान होते.
