कोल्हापूर प्रतिनिधी, : स्वातंत्र्यदिन म्हणजे केवळ ध्वजारोहणाचा दिवस नव्हे, तर देशासाठी काहीतरी करण्याची उमेद, नव्या पिढीच्या मनात ऊर्जा आणि राष्ट्रभक्तीची ज्योत चेतविणारा दिवस. याच देशभक्तीच्या उत्साहाला तरुणाईच्या जोशाची आणि कलेची जोड देत रगडियन जिमचा चौथा वर्धापनदिन रामकृष्ण हॉल येथे दिमाखदार सोहळ्यात उत्साहात साजरा झाला. स्वातंत्र्यदिनाचा अभिमान आणि रगडियनच्या चार वर्षांच्या वाटचालीचा आनंद यांचा अनोखा संगम या सोहळ्यात अनुभवायला मिळाला.
रगडियन जिमच्या सभासदांनी कार्यक्रमात उत्स्फूर्त सहभाग नोंदवत विविध सांस्कृतिक कार्यक्रम सादर केले. नृत्य, कला आणि मनोरंजनाच्या सादरीकरणाने संपूर्ण सभागृहात उत्साहाचे वातावरण निर्माण झाले. व्यायामाच्या माध्यमातून शरीर घडविणारी ही तरुणाई केवळ स्नायूंची ताकद नव्हे, तर कलेची, आत्मविश्वासाची आणि सामाजिक जाणीवेची ताकदही जपते, याचा प्रत्यय या कार्यक्रमातून आला.
आजच्या धावपळीच्या आणि बदलत्या जीवनशैलीत तरुणांनी आरोग्याला प्राधान्य देणे ही काळाची गरज आहे. व्यायाम, शिस्त आणि सकारात्मक दृष्टिकोनातून सक्षम पिढी घडविण्याचे काम जिमसारख्या व्यासपीठातून होत असते. त्यामुळे रगडियन जिमचा चौथा वर्धापनदिन हा केवळ संस्थेच्या चार वर्षांच्या प्रवासाचा उत्सव न राहता, निरोगी आणि आत्मविश्वासपूर्ण तरुणाईच्या वाटचालीचा उत्सव ठरला.
यावेळी कोरगावकर ट्रस्टचे राज कोरगावकर यांचा वाढदिवसही उत्साहात साजरा करण्यात आला. उपस्थित मान्यवरांनी त्यांना वाढदिवसाच्या शुभेच्छा देत पुढील वाटचालीसाठी सदिच्छा व्यक्त केल्या. वाढदिवसाचा आनंद, वर्धापनदिनाचा उत्साह आणि स्वातंत्र्यदिनाचा राष्ट्राभिमान यामुळे सोहळ्याला विशेष रंगत आली.
या दिमाखदार सोहळ्यास निवृत्त पोलीस उपअधीक्षक तानाजी सावंत, भाजपा नेते राहुल चिकोडे, राष्ट्रवादी काँग्रेसचे जिल्हाध्यक्ष आदिल फरास, उद्धव बाळासाहेब ठाकरे शिवसेना पक्षाचे विराज पाटील, कोल्हापूर स्थानिक गुन्हे अन्वेषण शाखेचे सुशांत चव्हाण, नगरसेवीका दिपाली संजय घाटगे, शिवसेना गटनेता मा. राहुल चव्हाण यांच्यासह विविध क्षेत्रातील अधिकारी, पदाधिकारी, पत्रकार, उद्योजक, युवा वर्गांची आणि मान्यवरांची उपस्थिती लाभली.
कार्यक्रमाच्या यशस्वी आयोजनासाठी रगडियन जिमचे प्रमुख आकाश कोरगावकर यांचे मार्गदर्शन लाभले. त्यांच्या मार्गदर्शनाखाली सभासद आणि कर्मचाऱ्यांनी नियोजनबद्ध पद्धतीने कार्यक्रमाची आखणी केली. अमोल कोरगावकर, आकाश कोरगावकर, पूनम कोरगावकर, ओम कोरगावकर, प्रशांत डांगरे यांच्यासह रगडियन जिमचे सभासद व कर्मचारी मोठ्या संख्येने उपस्थित होते.
स्वातंत्र्याचा अभिमान, तरुणाईचा उत्साह आणि आरोग्यपूर्ण जीवनाचा संदेश या त्रिसूत्रीने रंगलेला रगडियन जिमचा चौथा वर्धापनदिन कोल्हापुरातील तरुणाईच्या उत्साहाला नवी ऊर्जा देणारा ठरला. देशासाठी सक्षम नागरिक घडवायचे असतील, तर शरीरासोबत मन आणि विचारही सक्षम झाले पाहिजेत, याची जाणीव करून देत हा सोहळा उत्साहाच्या आणि जल्लोषाच्या वातावरणात संस्मरणीय ठरला.