कोल्हापूर महानगरपालिका २०२२-२३ चे नवीन अंदाजपत्रक जाहीर....!

Getting your Trinity Audio player ready...

Read Time:57 Minute, 7 Second

विशेष वृत्त,अजय शिंगे-कोल्हापूर प्रतिनिधी:

सन 2021-22 चे अर्थसंकल्पामधील अंमलबजावणी –

मागील तीन वर्षाचा आढावा घेतला असता सन 2019 मधील शहरामध्ये आलेला प्रचंड महापूर, सन 2020 व सन 2021 मधील कोरोना पहिली, दुसरी व तिसरी लाट व सन 2021 मध्ये पुन्हा आलेला प्रचंड महापूर यामुळे शहरातील नागरिकांना मोठया संकटांस तोंड द्यावे लागले आहे. महानगरपालिकेच्या यंत्रणेवरही मोठया प्रमाणावर ताण आलेला होता. यामधूनही महानगरपालिकेने नागरिकांना देत असलेल्या सेवा सुविधा, महापुर कालावधीमधील आपत्ती व्यवस्थापन, आपत्ती पुर्व व आपत्तीनंतरच्या उपाय योजना यामध्ये अतिशय चांगले काम केले आहे. मागील सलग तीन वर्षामधील आपत्तींमुळे महानगरपालिकेच्या आर्थिक परिस्थितीवर त्याचा परिणाम झाला आहे

सन 2021-22 च्या अंदाजपत्रकामध्ये महिलांसाठी स्वतंत्र शौचालये बांधणेचे दोन प्रस्ताव मंजूर करण्यात आले आहेत. कोटीतिर्थ तलाव पुर्नजीवकरण चे रु.2.95 व वेस्ट वॉटर रिसायकलिंग रु.1 कोटीचे कामाची निविदा प्रसिध्द करण्यात आली आहे. लिकेज डिटेक्शन प्रोग्रॅम हाती घेण्यात आला आहे. हेरीटेज वास्तु संवर्धनामध्ये विल्सन पूल, संप हाऊस नजीकचा पूल येथे हेरिटेज लायटिंग टेंडर मंजूर झाले आहे. सफाई सुरक्षा मित्र चॅलेंज योजना राबविण्यात आली आहे. महावीर उद्यान येथे सेन्सरी गार्डन विकसीत करणेचे काम मंजूर करण्यात आले आहे.

त्याचप्रमाणे 2021 मधील महापूराच्या पार्श्वभुमीवर पाणी बिलांमध्ये 1 महिन्याची सवलत देण्यात आली आहे. कोवीड प्रार्दुभाव विचारात घेऊन मनपा लायसेन्स व फायर परवाना यामध्ये वेळोवेळी नुतणीकरणासाठी विना दंड मुदतवाढ देण्यात आली आहे.

2021-22 च्या आर्थिक वर्षामध्ये कोवीड-19 च्या दुसऱ्या लाटेचा मोठा प्रार्दुभाव झाला. यामध्ये कोमनपाकडून शहरी व ग्रामीण नागरीकांना मोफत उपचारासाठी 18 डीसीएचसी/डीसीएच व सीसीसी कोवीड केंद्र स्थापन केली होती. यामध्ये पहिल्या लाटेमध्ये 6200 व दुसरे लाटेमध्ये 11000 कोवीड पेशंटस् यांचेवर उपचार करण्यात आले. यासाठी मनपा निधी/ वित्त आयोगमधून कोवीड वैद्यकीय यंत्रणा, मनुष्यबळ, औषधे, अन्न व उपचार साहित्य यासाठी जवळपास रु.4 कोटी खर्च करण्यात आला आहे व डिपीडीसीमध्ये रु.2.95 कोटी निधी कोवीडसाठी प्राप्त झाला आहे. तसेच शहरातील 68 कोवीड हॉस्पीटल्स् यांचेकडील कोवीड पेशंटस् साठी उपलब्ध बेडबाबत माहिती कोवीड कक्षाकडून उपलब्ध करुन दिली जात होती. तसेच मनपा क्षेत्रातील खाजगी रुग्णालयामध्ये कोवीड उपचार घेतलेल्या पेशंटस्ची देयक मनपा लेखापरिक्षकांकडून तपासली जात होती. यामध्ये रुग्णालयांकडून शासन नियमापेक्षा जादा आकारण्यात आलेल्या बिलांमध्ये तपासणी अंती कोवीड दुसरी लाट मध्ये रु. 3.41 कोटी रक्कम कमी करुन संबंधित पेशंटस् योना लाभ देण्यात आला.

प्रस्तावीत अर्थसंकल्पातील ठळक बाबी पुढे नमूद आहेत.

सन 2022-23 चे अर्थसंकल्पामधील ठळक बाबी / प्रकल्प –

पाणीपुरवठा विभाग प्रकल्प –
कोटीतिर्थतलाव पूर्नजीवीकरण, वेस्ट वॉटर रि-सायकल प्रकल्प –

शहराच्या मध्यवर्ती ठिकाणी कोटीतिर्थ तलाव आहे. तलावाचे प्रदुषण कमी करणे, संवर्धन करणेसाठी प्रकल्प तयार करणेत येत आहे. कोटीतिर्थ तलावाचे पुर्नजीवीकरण करणेसाठी वित्त आयोग मधून रु.2.95 कोटीचा प्रकल्प मंजूर करण्यात आला आहे. तलावाचे पुर्नजीवीकरण, संवर्धनामुळे जैवविविधेस चालना होणार आहे व चांगले पर्यटन स्थळही विकसीत होणार आहे.

त्याचप्रमाणे कळंबा फिल्टर व बावडा फिल्टर येथे वेस्ट वॉटर रिसायकलींगचा रु.1 कोटीचा प्रकल्प मंजूर करण्यात आला आहे. उपरोक्त दोन्ही कामे अंदाजपत्रकीय वर्षामध्ये पूर्ण करण्यात येत आहेत.

लिकेजडिटेक्शन प्रोग्रॅम –

पाणी पुरवठा वितरण व्यवस्थेमधील पाईप लाईन लिकेजीस् कमी करणेसाठी स्वतंत्र लिकेज डिटेक्शन प्रोग्रॅम राबविणे बाबत मंजूरी देण्यात आली आहे. लिकेजीस् कमी केल्याने पिण्याचे पाणी पुरेशा दाबाने पुरविता येणे शक्य आहे, तसेच पाणी बिलींग वाढणे, वेस्ट वॉटर कमी करणे इ.साठी मदत होणार आहे.

पाणीपुरवठा रिडींग एएमआर मशिन्स बसविणे –

पाणी पुरवठा बिलींग यंत्रणा बळकट करणेसाठी औद्योगिक व व्यापारी कनेक्शन धारक यांचेसाठी पाणी रिडींगसाठी एएमआर मशिन्स बसविणेबाबत प्रस्तावीत आहे. सदर मशिन्समुळे पाणी बिलींग व्यवस्थेमध्ये सुधारणा होऊन उत्पन्न वाढ होणार आहे, तसेच बिलींगमधील गळती शोधणेस मदत होणार आहे.

पर्यावरणअनुषंगिक प्रकल्प –
टेंबलाईउड्डाण पूलाच्या खालील बगीचा, हरित पट्टा विकसीत करणे –

शहरातील रहिवाशांना नागरी सुविधा निर्मिती करणेसाठी केंद्र शासन पुरस्कृत नागरी वनीकरण हरित पट्टे हे महत्वकांक्षी अभियान राबविणेत येत आहे. त्या अंतर्गत शहरातील मोक्याच्या जागी अथवा उद्याना अंतर्गत हरित क्षेत्र विकसित करणेचे कामांचा समावेश होतो. कोल्हापूर महानगरपालिका हद्दीतील रेल्वे फाटक क्र.2 जवळ उड्डाण पूल आहे. टेंबलाई उड्डाण पूल हा कोल्हापूर महानगरपालिका क्षेत्रातील एकमेव उड्डाण पूल असून ते अत्यंत महत्वाच्या व मोक्याच्या ठिकाणी आहे. उजळाईवाडी विमान तळावरुन येणारा प्रमुख मार्ग हा उड्डाण पूलावरुन जातो. तसेच कर्नाटककडून शहरात येणारा हा प्रमुख मार्ग आहे. पुणे-बेंगलोर या महानगरच्या धर्तीवर सदर उड्डाण पूलाच्या जागी बगीचा विकसित केला असता शहराच्या सौदर्यकरणामध्ये नक्कीच भर पडेल. तसेच स्वच्छ सर्वेक्षण अभियान अंतर्गत देखील शहर स्वच्छ व सुंदर दिसण्यासाठी उड्डाण पुला खालील मोकळया जागेवर हिरवळ निर्माण करणे, व्हर्टिकल गार्डन तयार करणे, उड्डाण पूलाची रंगरंगोटी करणे, उड्डाण पूल आकर्षक दिसतील अशा उपाययोजना करणे या कामांचा समावेश यामध्ये केला आहे. याकामी अंदाजे रु.65 लाख खर्च अपेक्षित आहे, अंदाजपत्रकामध्ये तरतूद करण्यात आली आहे.

कणेरकरनगर,कोल्हापूर येथील ओपन स्पेस येथे उद्यान/हरित पट्टे विकसित करणे –

कोल्हापूर महानगरपालिका हद्दतील कणेरकर नगर या उप-नगरा अंतर्गत ए वॉर्ड मौजे बालिंगे रि.स.नं.242/14 व 242 9 ते 13 या मंजूर ले-आऊट अंतर्गत ओपन स्पेस को.म.न.पा.च्या ताब्यात आलेली आहे.

सदर परिसरा अंतर्गत जवळपास कोणतेही उद्यान नसलेने जेष्ठ नागरीक, लहान मुले तसेच इतर नागरीकांसाठी कोणतेही विरंगुळयाचे साधन नाही. त्यामुळे परिसरा अंतर्गत अमृत हरित पट्टे च्या मार्गदर्शक तत्वानुसार उद्यान विकसित करताना सावली देणारी शोभिवंत व फळे देणारी वृक्ष लागवड करणेत येणार असून पशू-पक्षी यांचा अधिवास व अन्न साखळी टिकून राहणे तसेच जैवविविधता टिकून राहणेस नक्कीच भर पडणार आहे. त्याचप्रमाणे नैसर्गिक पाथ – वे, चिल्ड्रन प्ले एरिया, गजिबो देखील समावेश करणेत आला आहे. याकामी अंदाजे रु.36 लाख खर्च अपेक्षित आहे. याकामी अंदाजपत्रकामध्ये तरतूद करण्यात आली आहे.

इलेक्ट्रीकवाहन चार्जिंग स्टेशन नागरिकांना सवलत योजना / इलेक्ट्रीक वाहन चार्जिंग स्टेशन उभारणी –

महाराष्ट्र शासन नगरविकास विभाग शासन निर्णय 20/08/2021 नुसार पर्यावरणपूरक शासन धोरणानुसार इलेक्ट्रीक वाहनांकरीता चार्जिंग स्टेशन उभारणाऱ्या स्थानिक नागरी संस्थां क्षेत्रातील नागरिकांना / गृहनिर्माण संस्थाना त्यांचा मालमत्ता करात सूट देणेबाबत योजना आहे. यास प्रशासक ठराव क्र.267 दि.15.12.2021 ने पायाभूत चार्जिंग व्यवस्था निर्मितीसाठी प्रोत्साहन म्हणून स्थानिक नागरी संस्थातील नागरिकांना / गृह निर्माण संस्थाना महाराष्ट्र इलेक्ट्रीक वाहन धोरण 2021 लागू असे पर्यन्त –

स्वत:च्याइलेक्ट्रीक वाहनाकरिता चार्जिंग स्टेशन उभारण्यास व त्यातून वाहनधारकांना चार्जिंग सुविधा उपलब्ध केलेस मालमत्ता करात 2 टक्के सूट.
गृहनिर्माणसंस्थामध्ये सामायिक सुविधाअंतर्गत सदस्यांना इलेक्ट्रीक वाहन चार्जिंग सुविधा उपलब्ध केल्यास मालमत्ता करात 3 टक्के सूट.
गृहनिर्माणसंस्थानी त्यांच्या मालकीच्या जागेत व्यापारी तत्वावर इलेक्ट्रीक वाहन चार्जिंग सुविधा, मूळ पार्किग वगळता अन्य मोकळया जागेत केल्यास सदर जागेवर व्यापारी दराने मालमत्ता आकारणी न करता घरगुती दराने करणेची मान्यता देण्यात आली आहे. (सदरची जागा आपत्कालीन कामाकरीता अडचणीची असू नये)

या व्यतिरिक्त कोमनपा कडून सार्वजनिक ठिकाणी इलेक्ट्रीक वाहने चार्जिंग स्टेशन्स उभारणी करणेबाबत प्रस्तावीत आहे.

व्हर्टीकलगार्डन उभारणे –

वातावरणातील धुलीकण कमी करणेकरिता उपाय योजनेचा एक भाग म्हणून शहरातील वाहतूकीचे वर्दळीचे ठिकाणी धुलीचे नियंत्रण होणेकरिता व्हर्टीकल गार्डन बिंदू चौक बुरुज येथे उभारणेचे काम नियोजित आहे. सदरील कामाकरिता रक्कम रुपये 29 लक्ष इतका खर्च अपेक्षित असून प्रत्यक्षातरित्या व्हर्टीकल गार्डन उभारलेनंतर पुढील तीन वर्षाकरिता रक्कम रुपये 4.5 लक्ष इतका खर्च गृहीत धरणेत आलेला आहे. सदरील व्हर्टीकल गार्डन विकसित केलेनंतर बिंदु चौक बुरुज या वास्तूचे सुशोभिकरण होण्यास मदत होणार आहे. तसेच वाहतूकीव्दारे निर्माण होणाऱ्या धुलीकणाचे नियंत्रण होणेस मदत होणार आहे.

इराणीखण स्वच्छता –

कोल्हापूर कोल्हापूर शहरामध्ये रंकाळया नजिक इराणी खण असून सार्वजनिक गणेशोत्सवामधील गणेशमुर्तींचे विर्सजन होते. यापुर्वी खणीमध्ये फक्त सार्वजनिक गणेशोत्सव मंडळांच्या 15 फुटांवरील व लहान मोठया सुमारे 200 ते 250 गणेशमुर्तींचे विसर्जन केले जात होते. परंतु अलीकडील 10 ते 15 वर्षांमध्ये पंचगंगा नदी व राजाराम तलावातील पाण्याचे प्रदुषण होऊ नये म्हणून दान झालेल्या सर्वच सार्वजनिक तसेच घरगुती गणेशमुर्तींचे विसर्जन इराणी खणीमध्ये केले जात आहे. तसेच कोरोना कालावधीमध्ये गेल्या 2 वर्षांमध्ये कोल्हापूर शहरातील सर्वच सार्वजनिक तसेच घरगुती गणेशमुर्तींचे विसर्जन इराणी खणीमध्ये करणेत आलेले आहे. यामध्ये 2 वर्षांमध्ये एकूण साधारणत: 85000 लहानमोठया गणेशमुर्तींचे विसर्जन इराणी खणीमध्ये करणेत आलेले आहे.

त्यामूळे सद्यस्थितीत सदरची खण विसर्जन केलेल्या गणेशमुर्तींनी भरलेली होती. विसर्जनासाठी अडथळे येऊ नयेत, तसेच अन्य तलाव,नदी यांचे प्रदुषण होऊ नये याकरीता सदरच्या खणीमध्ये विसर्जित झालेल्या मुर्तीं व गाळ काढून खण साफ करणे आवश्यक होते. त्याकरीता महानगरपालिकेने सदरची खण साफ करणेचे काम हाती घेतलेले असून काम मंजूर आहे. यामध्ये इराणी खणीमधील पाणी पंपाने उपसा करणे, गाळ काढून वाहतुक करुन टाकणे व पुन्हा खण स्वच्छ पाण्याने भरणे अशी तरतुद आहे.

वॉटरफौंटन उभारणी / वृक्ष गणना, हेरीटेज वृक्ष संवर्धन –

हवेतील धुलीकण कमी करणेकरिता उपाय योजनेचा एक भाग म्हणून शहरातील वाहतूकीचे वर्दळीचे ठिकाणी धुलीचे नियंत्रण होणेकरिता प्रमुख वाहतूकीच्या ठिकाणी वॉटर फॉउटन उभारणेचे काम नियोजित आहे. यामध्ये नव्याने गंगावेश चौक, फुलेवाडी जकात नाका चौक, हॉकी स्टेडीयम चौक या ठिकाणी नव्याने फौंटन बसविणे व माऊली चौक,राजारामपुरी व गांधी पुतळा,गांधी मैदान येथे अस्तित्वातील फौंटन्स् दुरुस्ती असे प्रस्तावीत आहे. सदरील वॉटर फॉउटन उभारलेनंतर वर्दळीच्या चौकाचे सुशोभिकरण होवून वाहनाव्दारे निर्माण होणाऱ्या धुलीकणाचे नियंत्रण होणेस मदत होणार आहे.

तसेच पर्यावरण संवर्धनाचे अनुषंगाने शहरातील वृक्ष गणना हाती घेण्यात येत आहे. सर्व वृक्षांच्या नोंदी घेणे, तसेच हेरीटेज वृक्षांचे संवर्धन करणे याचा समावेश प्रस्तावीत कामांमध्ये आहे. अंदाजपत्रकामध्ये याकामी तरतूद करण्यात आली आहे.

पर्यावरणीयकामे नदी प्रदुषण रोखणे –

कोल्हापूर महानगरपालिका क्षेत्रामध्ये दैनदिन निर्माण होणाऱ्या सुमारे 96 द.ल.लि. सांडपाण्यापैकी दैनदिन 90.39 एमएलडी पर्यंत सांडपाण्यावर सद्यस्थितीमध्ये यशस्वीरित्या प्रक्रिया केली जाते. यामध्ये बावडा एसटीपी 76 एमएलडी, दुधाळी एसटीपी 17 एमएलडी कार्यान्वीत करण्यात आलेले आहेत. अमृत योजनेअंतर्गत दुधाळी येथे 6.00 एमएलडी व कसबा बावडा येथे 4.00 एमएलडी सांडपाणी प्रक्रिया प्रकल्पाचे काम प्रगतिपथावर असून उर्वरीत सहा नाले अडविणे व वळविणेचे काम हाती घेण्यात येत आहे. यामुळे पंचगंगा नदी प्रदुषण मुक्त करणेस मदत होणार आहे.

तसेच थेट पाईपलाईन अंमलबजावणी अंती पाणी पुरवठयामध्ये वाढ होणार आहे तसेच निर्माण होणारे सांडपाणीमध्ये ही वाढ होणार आहे. त्याकरीता संपूर्ण शहरासाठी नव्याने सांडपाणी प्रक्रीया केंद्र बांधणे, ड्रेनेज लाईन टाकणेबाबत प्रस्तावीत आहे. यासाठी अवश्यक डिपीआर तयार करुन घेणेत येत आहे.

आरोग्य व स्वच्छता अनुषंगिक प्रकल्प –

मनपाहॉस्पीटल सुधारणा, कोवीड-19 प्रतिबंध उपाययोजना, नर्सिंग प्रशिक्षण, मेडीकल लायब्ररी, नागरी आरोग्य केंद्र 11 सब सेंटर्स मंजूर –

कोमनपामार्फत शहरातील नागरिकांसाठी 3 मोठे हॉस्पीटल्स्, 11 नागरी सुविधा केंद्रे व 15 वॉर्ड दवाखाने, 2 फिजिओथेरपी सेंटर्स उपलब्ध करुन देण्यात आले आहेत. एम.आर.देसाई फिजिओथेरपी सेंटर,ताराबाई पार्क व डि.एन.शिर्के फिजिओथेरपी सेंटर, गांधी मैदान यांचेसाठी आवश्यक इमारत दुरुस्ती, नवीन उपकरणे/ साहित्य यासाठी अंदाजपत्रकामध्ये तरतूद करण्यात आली आहे. कोरोनाच्या पार्श्वभूमीवर वैद्यकीय सुविधा सक्षमीकरण करण्यात आले आहे. आवश्यक वैद्यकीय अधिकारी, नर्सिंग स्टाफ पुरेशा प्रमाणात उपलब्ध करुन देण्यात आला आहे. हॉस्पीटल सुधारणा अंतर्गत सावत्रिबाई फुले रुग्णालयामध्ये अत्याधुनिक अतिदक्षता विभाग (आयसीयु) सुरु करण्यात आला आहे. याकामी आवश्यक सर्व सिव्हील काम व अत्याधुनिक वैद्यकीय उपकरणे उपलब्ध करण्यात आलेली आहेत व सुसज्ज आयसीयु ची उभारणी करण्यात आली आहे. आयसोलेशन हॉस्पीटल येथे कोवीड केअर सेंटर सुरु करण्यात आले आहे. रुग्णांसाठी आवश्यक औषधांचा पुरेसा साठा ठेवणेसाठी इन्वेंटरी ठेवणेत आली आहे. आवश्यक तज्ञ डॉक्टर्स उपलब्ध करुन देण्यात आले आहेत. याव्यतिरिक्त हॉस्पीटल्स्चा दर्जा उंचावणेसाठी विशेष तज्ञ डॉक्टर्स् केसबेसीसवर उपलब्ध करण्यात येत आहेत. वैद्यकीय सेवा श्रेणीवाढसाठी सर्वतोपरी प्रयत्न करण्यात येत आहेत. त्याचप्रमाणे सा.फुले हॉस्पीटल डायग्नोस्टिक बिल्डींग येथे रुग्णांसाठी लिफ्ट सुविधा उपलब्ध करुन देण्यात आली आहे. वैद्यकीय उपकरणे/साहित्य घेणेसाठी अंदाजपत्रकामध्ये विविध लेखाशिर्ष अंतर्गत तरतूद करण्यात आली आहे.

त्याचप्रमाणे सावित्रीबाई फुले हॉस्पीटल तिसरा मजला येथे नर्सिंग प्रशिक्षण केंद्र, मेडीकल लायब्ररी सुरु करणेबाबत प्रस्तावीत आहे. याकामी अंदाजपत्रकामध्ये तरतूद करण्यात आलेली आहे.

तसेच कोल्हापूर महागनरपालिकेसाठी कुटूंब कल्याण केंद्र अंतर्गत 11 सब सेंटर्स मंजूर करण्यात आलेले आहेत. नागरिकांसाठी या ठिकाणी वैद्यकीय सेवा-सुविधा उपलब्ध करुन देण्यात येत आहेत.

फिरतेदवाखाने सुविधा देणे / आरोग्य सुविधा सुधारणा –

शहरामध्ये विविध ठिकाणी झोपडपट्या व जुने गावठान येथे दाट वस्ती आहे. या ठिकाणी अधिक चांगल्या आरोग्य सुविधा देणेसाठी झोपडपट्टी येथे फिरते दवाखाने सुरु करणेबाबत प्रस्तावीत आहे. नागरिकांना त्यांचे राहते ठिकाणी चांगल्या आरोग्य सुविधा देणेबाबत नियोजित आहे.

तसेच मनपा हॉस्पीटल्समध्ये मनपा कर्मचारी/ सेवा निवृत्ती कर्मचारी यांना अधिक चांगल्या आरोग्य सेवा देणेसाठी कर्मचारी हेल्थ कार्ड योजना राबविणे येत आहे.

नवीनशौचालये उभारणी ( महिला ) –

सार्वजनिक ठिकाणी महिलांसाठी स्वतंत्र शौचालये उभारणीसाठी मंजूरी देण्यात आली आहे. सार्वजनिक ठिकाणी वावरताना महिलांसाठी सर्व सोयींयुक्त स्वच्छतागृहांची पुरेशी संख्या उपलब्ध करुन देणे आवश्यक आहे. यासाठी शहरामध्ये महिलांसाठी गांधी मैदान परिसर व सानेगुरुजी वसाहत परिसर येथे स्वच्छ व पुरेशा सुविधांसह नव्याने महिला स्वच्छतागृहे बांधणेबाबत मंजूरी देण्यात आली आहे. याकामी रु.40 लाख खर्च अपेक्षित आहे.

वॉटरलेस युरिनल्स / फिरते शौचालय –

पाणी पुरवठा केले नंतर त्यामधील बहुतांशी पाणी हे केवळ शौचालय, बाथरुम स्वच्छतेसाठी वापरले जाते आणि तरीही अस्वच्छता, दुर्गंधी या गोष्टींना आपल्याला समोरे जावे लागते. यासाठी गंधहीन, पाणीविरहीत, टच फ्रि मुतारी हा पर्याय उपलब्ध आहे.

पारंपारीक मुतारीमध्ये अतिरिक्त प्रमाणात पाणी वापरावे लागते, तर नेचर सॅनी पाणी विरहीत मुतारीच्या सहाय्याने पाणी बचत शक्य आहे. सदर मुतारी अशा पध्दतीने डिझाईन केली आहे की त्या मुतारीमधील युरीनचा प्रत्येक थेंब गोळा होतो. मुतारीमधील वरच्या सिल्व्हर नॅनो कोटींग मुळे स्वच्छता राखून ठेवण्यास मदत होते. मध्यवर्ती असलेले ग्रीन काट्रीज पेंटेड युनिडायरेक्शन टेक्नॉलॉजीवर काम करते. त्यातून युरिन थेंब वरुन खाली गेल्यावर काट्रीज फिट बसते व अमोनिआ सारखे वायु व दुर्गंधी यांना बाहेर पाडण्यास रोखते. सदर युरिनल्सचा वापर प्रथम मनपा मुख्य इमारत व निवडणूक कार्यालय,ताराबाई पार्क येथे 10 युनिट युरिनल्स बसविणेबाबत प्रस्तावीत करण्याता आले आहे.

त्याचप्रमाणे सीएसआर माध्यमातून परिवहन कडील बसवर अद्ययावत फिरेते शौचालय तयार करणेत आले आहे. शहरातील गर्दीचे ठिकाणी, पार्किंग ठिकाणी याचा वापर सुरु आहे. अंदाजपत्रकीय वर्षामध्ये आणखी नव्याने फिरते शौचालये तयार करणेबाबत प्रस्तावीत आहे.

घनकचराव्यवस्थापन प्रकल्प –
घनकचराव्यवस्थापन अंतर्गत 180 टन प्रतिदिन क्षमतेचा आधुनिक घनकचरा प्रक्रिया प्रकल्प कार्यान्वीत करणेत आला आहे.
इनर्टमटेरियलसाठी टाकाळा येथे लॅण्डफिल साईट विकसीत करण्यात आलेली आहे. टोप येथील लॅण्डफिल साईट विकसीत करण्या बाबत प्रस्तावीत आहे.
कसबाबावडा प्रकल्पाच्या ठिकाणी वर्षानुवर्षे विना प्रक्रिया पडलेल्या कचऱ्यावर बायोमायनिंग तंत्रज्ञानाचा वापर करुन सदर ठिकाणी मोठया प्रमाणात साठलेल्या कचऱ्याची विल्हेवाट लावणेसाठी बायोमायनिंग प्रकल्प कार्यान्वीत करणेत आला आहे. याकामी बावडा प्रोसेसिंग प्रकल्पावरील खुली करण्यात येत आहे.
प्लास्टीकश्रेडींग मशिन – प्लास्टीकचे पर्यावणपूरक विल्हेवाटीसाठी श्रेडींग मशिन्स मनपामार्फत बसविणेत येत आहेत. शहरातील बिंदू चौक पार्किग, महालक्ष्मी मंदिर पार्किग, रंकाळा परिसर, मध्यवर्ती बस स्थानक व रेल्वे स्टेशन या ठिकाणी सदर प्लास्टीक श्रेडींग मशिन बसविण्यात येत आहेत. गर्दीच्या ठिकाणी नागरिक,पर्यटक यांचेकडून पाणी बॉटल्स,प्लास्टीक सार्वजनिक जागेवर टाकणेत येते सबब या ठिकाणी सदर मशिनमुळे सर्व प्लास्टीक तात्काळ श्रेड करुन त्याची पर्यावरणपूरक विल्हेवाट लावणे शक्य होणार आहे.
घंटागाडी– यापुर्वी स्वच्छ भारत मिशनमधून 108 ऑटो टिप्पर खरेदी करण्यात आले आहेत. चालू आर्थिक वर्षामध्ये आणखी 65 ऑटो टिप्पर खरेदी करण्यात आले आहेत, यामुळे घरोघरी ओला, सुका कचरा गोळा संकलीत करणे सुलभ झाले आहे.
ऍ़निमलशेल्टर – कोमनपा आयसोलेशन हॉस्पीटल परिसर नजीक उनाड व भटकी कुत्री यांचे निर्बिजीकरण/लसीकरण केंद्र आहे. तथापी शहरातील जखमी व आजारी कुत्र्यांना उपचार केलेनंतर काही कालावधीकरीता ठेवणे करीता ऍ़निमल शेल्टर प्रस्तावीत आहे. जिल्हा पशुशल्य चिकित्सा दवाखाना नजीक मनपा ऍ़निमल शेल्टर प्रस्तावीत आहे. अंदाजत्रकीय वर्षामध्ये शेल्टर उभारणी करण्यात येत आहे.
लहानजनावरे यांचेसाठी गॅस दाहिनी – शहरामधील मृत कुत्रा,मांजर,लहान जनावरे इत्यादी यांचे पर्यावरणपुरक विल्हेवाटसाठी लहान जनावरे गॅस दाहीनी स्मशान भुमी येथे बसविणेबाबत प्रस्तावीत आहे.
सीऍ़न्ड डी वेस्ट प्रकल्प – स्वच्छ भारत अभियान (नागरी) अंतर्गत कन्ट्रक्शन वेस्ट चे पर्यावरण पुरक विल्हेवाट लावणेसाठी सी ऍ़न्ड डी वेस्ट प्रकल्प किंमत रु.5 कोटी मंजूर करण्यात आला आहे. सदर प्रकल्पाची उभारणी करुन कन्ट्रक्शन वेस्ट पर्यावरण पूरक डिस्पोज करणेबाबत प्रस्तावीत आहे.
शहरविकास प्रकल्प, हेरीटेज, शहर सौंदर्यिकरण प्रकल्प, पर्यटन प्रकल्प –
महालक्ष्मी मंदिर परिसर विकास प्रकल्प –

कोल्हापूर तिर्थक्षेत्र विकास आराखडयाच्या प्रथम टप्प्यातील रक्कम रु.79.96 कोटीच्या कामांना राज्य शासनाची प्रशासकीय मान्यता प्राप्त झाली आहे. सदर प्रशासकीय मान्यतेनुसार पहिल्या टप्प्यातील रु.8.20 कोटी निधी मनपास प्राप्त झाला आहे. शहरात येणाऱ्या भाविक /पर्यटक यांना पार्किंग सुविधा पुरविणे कामी सरस्वती चित्रमंदिरा नजिक महानगर पालिकेच्या जागेवर बहुमजली स्मार्ट पार्कींग सुविधेव्दारे चार चाकी व दुचाकी वाहनांच्या पार्किंगचे काम सुरु झाले आहे. उर्वरीत निधी अंदाजपत्रकीय वर्षामध्ये प्राप्त करुन आराखडेप्रमाणे उर्वरीत कामे पूर्ण करणेत येत आहेत.

काळम्मावाडीथेट पाईपलाईन – कोल्हापूर शहरास कायम स्वरुपी शुध्द व मुबलक पाण्याचा पुरवठा करणेच्यादृष्टीने काळम्मावाडी धरण हा उद्भव धरणेत येऊन थेट पाईपलाईन योजनेचे काम सुरु आहे. रु.425 कोटीची महत्वाकांक्षी योजना आहे. यामध्ये केंद्र/राज्य यांचे अनुदान प्राप्त आहे. मनपा हिश्श्याची उपलब्धताही करण्यात आली आहे. योजनेचे काम पुर्णत्वाच्या मार्गावर आहे, कामाची पुर्तता करणेबाबत सर्वतोपरी प्रयत्न करण्यात येत आहेत.
अमृतअभियान अंतर्गत मलनिस्सारण योजना – शहरातील दुधाळी झोनमधील 112.90 कि.मी. इतक्या लांबीची ड्रेनेज लाईनचे काम अमृत अभियान अंतर्गत सुरु आहे. अंदाजपत्रकीय वर्षामध्ये काम पूर्ण करुन घेणेत येत आहे.
अमृतअभियान अंतर्गत पाणीपुरवठा वितरण योजना – अमृत अभियान अंतर्गत कोल्हापूर शहरासाठी रु.114.81 कोटीची पाणी पुरवठा योजनेचे काम सुरु आहे. प्रत्यक्ष काम सुरु असून अंदाजपत्रकीय वर्षामध्ये योजने काम पूर्ण करणेत आहे.
कसबाबावडा येथील बावडा पॅव्हेलियन मैदान विकसीत करणे रक्कम रु.1.11 कोटी

कोल्हापूर महानगरपालिका अंतर्गत कसबा बावडा येथील बावडा पॅव्हेलियन मैदान विकसीत करणे कामी रक्कम रु.1.11 कोटी प्रस्तावित कामांस महाराष्ट्र सुवर्ण जयंती नगरोत्थान महाअभियान जिल्हास्तर मधून प्रशासकीय मान्यता प्राप्त आहे. या कामी रितसर निविदा मंजूर आहे. सदर कामाचा कार्यादेश देणेत आलेला असून मैदानातील फलड लाईटचे काम पूर्ण झालेले असून टेस्टींगचे काम शिल्लक आहे. व्हॉलिबॉल कोर्टचे काम पूर्ण झालेले असून सिंथेटिक कोर्टचे काम शिल्लक आहे. बास्केट बॉल कोर्टचे काम पूर्ण झालेले आहे. कबड्डी मैदानाच्या सर्व थरांचे काम पूर्ण झालेले असून लाल मातीच्या थराचे काम शिल्लक आहे. नवीन अंदाजपत्रकीय वर्षामध्ये सर्व कामाची पुर्तता करुन घेण्यात येत आहे. नागरिकांसाठी अद्ययावत मैदान उपलब्ध करुन देण्यात येत आहे.

जनावरेधुण्यासाठी (कॅटल सर्व्हिसिंग सेंटर) बांधणे व कसबा बावडा येथे कृत्रीम विसर्जन कुंड बांधणे.

पंचगंगा नदीचे प्रदूषण रोखणे यातील एक भाग म्हणुन नदी व तलाव येथे जनावरे धुणे करिता पर्यायी व्यवस्था करणे तसेच कृत्रिम गणेश विसर्जन कुंड बांधणे जिल्हा वार्षिक योजना सन 2020-21 अंतर्गत कोल्हापूर महानगरपालिका क्षेत्रामध्ये तांबट कमान व कसबा बावडा येथे प्रत्येकी एक या प्रमाणे जनावरे धुण्यासाठी (कॅटल सर्व्हिसिंग सेंटर) सेंटर बांधणे व कसबा बावडा व तांबट कमान,रंकाळा येथे कृत्रीम विसर्जन कुंड बांधणे कामासाठी रु.44.47, लाख निधी मंजूर आहे. सदर कामाची निविदा प्रक्रिया पूर्ण झाली असून अंदाजपत्रकीय वर्षामध्ये कामाची पुर्तता करणेत येत आहे. नदी प्रदुषण व तलाव प्रदुषण रोखणेस या कामामुळे मदत होणार आहे.

रंकाळातलाव परिसर विकास योजना रु.9.84 कोटी / रंकाळा बोटॅनिकल गार्डन, ग्रंथालय, थीम पार्क इ.विकास रु. 7.05 कोटी –

महानगरपालिका क्षेत्रात मुलभूत सोई-सुविधांचा विकास योजनेअंतर्गत रंकाळा तलाव परिसर विकास योजना हाती घेण्यात आली आहे. यामध्ये शालीनी पॅलेस ते पीडब्यूडी बिल्डींग वाशी नाका अंदाजे 2 कि.मी.चा पाथ-वे, वॉक-वे, नेचर पार्क, ईको-झोन, रंकाळा टॉवर ते तांबट कमान तलाव भिंतीची रिपेअरी/रेट्रोफिटींग करणे, एन्ट्री गेटस्, पार्किंग, वॉटर एटीएम, टॉयलेटस्, लॅन्डस्केपींग, वृक्षारोपण इ.कामांचा समावेश आहे. याकामी रु.9.84 कोटीची योजना मंजूर आहे. अंदाजपत्रकीय वर्षामध्ये कामाची पुर्तता करणेत येत आहे. शहर सौदर्यिकरण व पर्यटन वाढीसाठी या प्रकल्पाची मदत होणार आहे.

तसेच रंकाळा बोटॅनिकल गार्डन, ग्रंथांलय /थीम पार्क, ओपन जीम, मल्टीपर्पज ग्राऊंड यासाठी प्रादेशिक पर्यटन विकास योजनेमधून रु.7.05 कोटी निधी मंजूर करण्यात आला आहे. सदर सर्व कामे अंदाजपत्रकीय वर्षात पूर्ण करुन घेणेचा मानस आहे.

केशवरावभोसले नाटयगृह/खासबाग परिसर विकास योजना टप्पा 2 – रु.1 कोटी –

हेरीटेज वास्तु असलेल्या केशवराव भोसले नाटयगृह व खासबाग मैदान यांचे नुतनीकरण करणेसाठी यापुर्वी शासन अनुदान व मनपा निधी असा एकूण रु.13 कोटी इतका खर्च करणेत आला आहे. सदर दोन्ही हेरीटेज वास्तुंच्या मूळ रचनेमध्ये कोणताही बदल न करता नुतनीकरणाचा प्रकल्प हाती घेण्यात येऊन कामाची पुर्तता करण्यात आलेली आहे. पश्चिम महाराष्ट्रामधील अत्याधुनिक व संपूर्ण वातानुकुलीत नाटयगृह उपलब्ध करुन देण्यात आलेले आहे.

आता दुसरा टप्पेमध्ये रु.1 कोटी निधी मंजूर करण्यात आला आहे. राजर्षि शाहूकालीन ऐतिहासिक खासबाग कुस्त्यांचे मैदानाच्या मुळ वास्तु रचनेमध्ये कोणताही बदल न करता या मैदानामधील आवश्यक कामे करणे तसेच नाटयगृहामधील उर्वरीत कामे करणेबाबत प्रस्तावीत आहे.

हेरीटेजवास्तू संवर्धन –

कोल्हापूर शहरामध्ये मोठया संख्येने हेरीटेज वास्तु आहेत. एैतिहासिक वास्तुंचा मौठा वारसा शहरास आहे. या हेरीटेज वास्तुंचे संवर्धन, विद्युत रोषणाई करणेबाबत प्रस्तावीत करण्यात आले आहे. अंदाजपत्रकामध्ये याकामासाठी रु.50 लाख तरतूद करण्यात आली आहे.

शहरामध्येआय.टी. पार्क विकसीत करणे –

कोल्हापूर शहराचे सर्वांगिन विकास व रोजगार निर्मितीसाठी आय.टी.पार्क असणे आवश्यक आहे. यासाठी मनपाच्या टेंबालाईवाडी येथील आरक्षीत जागेवर पीपीपी माध्यमातून आयटी पार्क विकसीत करणेबाबत प्रस्तावीत आहे. यासाठी आवश्यक फिजीबीलीटी रिपोर्ट व अनुषंगिक काम पूर्ण करणेत आले आहे. याकामी निविदा प्रक्रीया राबवून आयटी पार्क विकसीत करणेबाबत प्रस्तावीत आहे. याकामी अनुषंगिक कामासाठी अंदाजपत्रकामध्ये तरतूद करण्यात आली आहे.

कोमनपाप्रशासकीय इमारत –

सध्याची महानगरपालिकेची प्रशासकीय इमारत व हेरीटेज वास्तु आहे. यामध्ये बदल, सुधारणा करणेवर अत्यंत मर्यादा आहेत. तसेच ऑफीसेस्ची संख्या पाहता अत्यंत अपुरी इमारत आहे. महानगरपालिकेची प्रशस्त व सुसज्ज प्रशासकीय इमारत असणे आवश्यक आहे. अर्थ संकल्पीय वर्षामध्ये नवीन, आधुनिक मनपा प्रशासकीय इमारतीसाठी प्रयत्नशील आहोत. प्राथमिक कामकाजासाठी मनपा अंदाजपत्रकामध्ये तरतूद करण्यात आली आहे.

ट्रॅफिकमॅनेजमेंट / ट्रॅफिक बुथस् , पार्किंग ऍ़प –

कोल्हापूर शहरामध्ये मोठया प्रमाणावर पर्यटक येत असल्याने व शहरातील वाढती रहदारी, वाहनांची संख्या याचा विचार करुन शहरामध्ये विविध ठिकाणी ट्रॅफिक सिग्नल यंत्रणा बसविणेत आली आहे. तसेच आवश्यक ठिकाणी ट्रॅफिक मॅनेजमेंटसाठी पट्टे मारणे, रोड डिव्हायडर पट्टे यासाठी तरतूद करण्यात आली आहे. तसेच शहरामध्ये 25 ठिकाणी ट्रॅफिक पोलीस बुथ उभारणे प्रस्तावीत आहे. शहर वाहतूक शाखेकडून कोल्हापूर शहरातील वाहतूकीचे सुयोग्य नियोजन करणे करीता याचा उपयोग होणार आहे.

त्याचप्रमाणे शहरातील ट्रॅफिक मॅनेजमेंटसाठी पार्किंग ऍ़प तयार करणेत येत आहे. नागरीक/पर्यटक यांना पार्किंग ठिकाणे, रियल टाईम उपलब्ध पार्किंग स्लॉट, पोहचणेसाठी रोड मॅप अशा सुविधा उपलब्ध करुन देण्यात येत आहेत. अंदाजपत्रकामध्ये सदर दोन्ही कामासाठी निधी उपलब्ध करण्यात आला आहे.

शिवाजीविद्यापीठ नजीक सायकल ट्रॅक –

कोल्हापूर महानगरपालिका अंतर्गत शिवाजी विद्यापीठ हायवे कँटीन ते डीओटी पर्यंत सायकल ट्रॅक करणेचे काम सुरु आहे. याकामी रु.25 लाख निधी मंजूर आहे. काम सुरु असून पुर्णत्वाच्या मार्गावर आहे.

क्रिडाबाबींसाठी उत्तेजन / क्रिडा स्पर्धा आयोजन –
मेजरध्यानचंद हॉकी स्टेडियम येथे ऍ़स्ट्रो टर्फयुक्त करणे –

भारत सरकार युवा कार्यक्रम व खेळ मंत्रालय या विभागाच्या खेलो इंडिया या राष्ट्रीय क्रीडा विकास योजने अंतर्गत कोल्हापूर महानगरपालिका येथील मेजर ध्यानचंद हॉकी स्टेडियम येथे ऍ़स्ट्रो टर्फयुक्त मैदान विकसीत करणेचे काम सुरु करणेत आले आहे.

सागरमाळक्रिकेट ग्राऊंड –

राज्य शासनाच्या मुलभूत सोई सुविधांचा विकासमधून शहरातील सागरमाळ येथे अद्ययावत क्रिकेट ग्राऊंड विकसीत करण्याचे काम सुरु आहे. सदरचे काम पुर्णत्वास आले आहे. शहरातील नागरिकांसाठी अद्ययावत क्रिकेट ग्राऊड उपलब्ध करण्यात येत आहे.

कसबाबावडा येथे अद्ययावत स्विमिंग टँक विकसीत करणे –

कसबा बावडा येथे अद्ययावत स्विमिंग टँक विकसीत करण्यात येत आहे. यासाठी राज्य शासनाकडून रु.90 लाख निधी मंजूर करण्यात आला आहे. मनपाकडून आवश्यक हिस्सा/अति. निधीची तरतूद करण्यात आली आहे. सदर कामाची निविदा प्रक्रियेसाठी मंजूरी देण्यात आली आहे. अंदाजपत्रकीय वर्षामध्ये कामाची पुर्तता करणेत येत आहे.

महिलांसाठीस्वतंत्र जीम तयार करणे –

कोल्हापूर महानगरपालिका क्षेत्रामध्ये महानगरपालिकेच्या बऱ्याच व्यायामशाळा आहेत. तथापि या व्यायामशाळांचा प्रामुख्याने पुरुषांसाठीच वापर होत आहे. त्यामूळे महिलांसाठी एखादी व्यायामशाळा असावी या उद्देशाने महानगरपालिकेने सानेगुरुजी वसाहत सुर्यवंशी कॉलनी ओपन स्पेसमध्ये महिलांकरिता सुमारे रु.35.00 लक्ष खर्च करुन व्यायामशाळा बांधलेली आहे. तथापि सदरच्या व्यायामशाळेमध्ये व्यायामाचे साहित्य उपलब्ध नव्हते. त्याकरीता व्यायाम साहित्य रक्कम रु.6.63 लाख क्रिडांगण विकास अनुदान योजना 2021-22 या जिल्हास्तरीय योजनेमधून प्रस्तावीत आहे. सदरच्या स्वतंत्र महिला जीममुळे महिलांना आरोग्याचे दृष्टीने लाभ होणार आहे.

क्रिडास्पर्धांचे आयोजन –

कोल्हापूर हे क्रिडा नगरी म्हणून ओळखले जाते. राष्ट्रीय, आंतरराष्ट्रीय स्तरावर शहरातील खेळाडूंनी चांगली कामगिरी दाखविलेली आहे. महानगरपालिकेकडून क्रिडा क्षेत्रास उत्तेजन देण्यासाठी महापौर चषक फूटबॉल, कुस्ती, स्वीमिंग, बॅडमिंटन इ.विविध प्रकारांमध्ये स्पर्धांचे आयोजन करण्यात येते. चालू आर्थिक वर्षातही महापौर चषक फुटबॉल स्पर्धांचे आयोजन पार पडले आहे. पुढील आर्थिक वर्षामध्येही महापौर चषक विविध क्रिडा स्पर्धाचे आयोजन प्रस्तावीत आहे. यासाठी अंदाजपत्रकामध्ये स्वतंत्र तरतूद करण्यात आलेली आहे. त्याचप्रमाणे मनपा स्तरावर दिव्यांगांसाठी क्रिडा स्पर्धा आयोजन करणेबाबत प्रस्तावीत आहे.

ई-गर्व्हनन्सप्रकल्प –
ई-गर्व्हनन्स,जीआयएस बेस सर्व्हे –

अद्ययावत सॅटेलाईन इमेज व आधुनिक तंत्रज्ञानच्या माध्यमातून शहरातील मिळकतींचा घरफाळा लागू करणेसाठी शोध मोहिम जीआयएसच्या माध्यमातून करणेत येत आहे. यासाठी प्रायोगिक तत्वावर एक प्रभागामध्ये काम सुरु करणेबाबत प्रस्तावीत आहे. या माध्यमातून कर आकारणी न झालेल्या मिळकतींचा शोध होऊन मनपा उत्पन्नामध्ये वाढ होण्यास मदत होणार आहे.

तसेच कोल्हापूर महानगरपालिका मोबाईल ऍ़प ही डिजीटल संकल्पना व समाजातील सामान्यातील सामान्य माणूस डोळ्यासमोर ठेवून हे ऍ़प तयार केले असून या ऍ़पच्या माध्यमातून विविध प्रकारच्या सेवा पुरविण्याचा प्रयत्न आहे. तसेच महानगरपालिका राबवित असलेल्या विविध योजना, अद्ययावत माहिती सर्व नागरिकांना त्वरीत उपलब्ध व्हावी यासाठी मनपाची सोशल मिडीया पेजेस् सुरु करण्यात येत आहे

दिव्यांगयोजना –
दिव्यांगबांधवांचे स्वावलंबन कार्ड ( UDID ) काढणे विशेष कॅम्पचे आयोजन –

कोल्हापूर महानगरपालिकेमार्फत नाविन्यपुर्ण उपक्रमां अंतर्गत दि.26 जून 2021 पासून राजर्षी छत्रपती शाहू महाराज दिव्यांग सक्षमीकरण अभियान राबविण्यात येत आहे. या अभियानामध्ये दिव्यांग बांधवांचा सर्व्हे करुन त्यांना अपंगत्वाचे प्रमाणपत्र (स्वावलंबन कार्ड UDID ) देणे, विविध शासकीय योजनांचा लाभ देऊन त्यांचे जीवनमान उंचावणे, आरोग्य विषयक संदर्भ सेवा देऊन अपंगत्वावर मात करण्याचा प्रयत्न करणे यांचा समावेश आहे. अभियानाच्या पहिल्या टप्प्यात मनपाकडून घरोघरी सर्व्हे करुन 21 दिव्यांग प्रकारातील 2152 दिव्यांगांच्या नोंदी करण्यात आल्या आहेत. तसेच दुसऱ्या टप्प्यामध्ये ज्या दिव्यांगानी अद्याप स्वावलंबन कार्ड UDID काढलेले नाही विशेष कॅम्प घेणे सुरु केले आहे.

महावीरउद्यान अंतर्गत दिव्यांग बांधव यांचेसाठी संवेदना उद्यान (Sensory Garden) विकसित करणे –

दिव्यांगांसाठी त्यांच्या संवेदना जागृत होणेसाठी व स्पर्शानी त्यांना ज्ञान मिळविण्याच्या दृष्टीने संवेदना उद्यान ही संकल्पना आहे. संवेदना उद्यानाची रचना कशी असावी यासाठीचे मॉडेल उद्यान नॅशनल असोसिएशन ऑफ ब्लाईंड, नाशिक येथे विकसित केले आहे. संवेदना उद्यान हे दिव्यांगांसाठी शैक्षणीकदृष्टया व त्यांना स्पर्श ज्ञानाने बुध्यांक वाढविण्याच्या दृष्टीने आवश्यक आहे. गंध, सुगंध, क्रिडा व सांस्कृतीक अशा वातावरण निर्मितीतून आंनद आणि मनोरंजनातून व्यक्तीमत्व विकास शास्त्रीय आणि विज्ञानाची सांगड घालणारे असे हे नाविन्य पूर्ण संवेदना उद्यान कोल्हापूर महानगरपालिका अंतर्गत महावीर उद्यान येथे विकसित करणेत येत आहे. याकामी रु.50 लक्ष अंदाजपत्रकामध्ये तरतूद करण्यात आली आहे.

मनपाई-लायब्ररी, लहान बालके यांचेसाठी वाचनालय (आनंदवाचन कक्ष)-

भास्करराव जाधव वाचनालयसह 4 मोठी वाचनालये शहराच्या विविध भागामध्ये सध्या कार्यरत आहेत. सध्याच्या कॉम्प्युटर युगाचा विचार करता मुक्त सैनिक परिसर, पितळी गणपती येथील मनपा इमारतींमध्ये सुसज्ज ई-लायब्ररीज् उभारणेबाबत प्रस्तावीत आहे. तसेच महिला व लहान बालके यांचेसाठी लायब्ररीमध्ये स्वतंत्र आनंदवाचन कक्ष उभारणेबाबत प्रस्तावीत आहे. अंदाजपत्रकामध्ये यासाठी तरतूद करण्यात आली आहे.

बोंद्रेनगर झोपडपट्टी येथे प्रधानमंत्री आवास योजना राबविणे –

शहरातील बोंद्रे नगर घोषित झोपडपट्टी येथील नागरिकांसाठी प्रधानमंत्री आवास योजना घटक क्र.4 लाभार्थ्याद्वारे स्वत:च्या जागेवर घर बांधणे ही योजना राबविणेत येत आहे. यासाठी प्रथम या झोपडीधारक यांचे नांवावर जागा करणेत आली आहे. 77 लाभार्थी यांना जागा त्यांचे नांवावर करुन देण्यात आली आहे. ईडब्लुएस अंतर्गत रु.2.50 लाख प्रत्येक लाभार्थी यांना उपलब्ध करुन देण्यात येत आहेत. त्यामुळे 77 लाभार्थी यांना त्यांचे स्वत:चे हक्काचे पक्के घर उपलब्ध होणार आहे.

पर्यटनवाढीसाठी खासबाग मैदान येथे प्रायोगिक कुस्ती, मर्दानी खेळ प्रदर्शन –

कोल्हापूर हे कुस्ती व मर्दानी खेळांसाठी प्रसिध्द आहे. शाहू कालीन एैतिहासिक वास्तू खासबाग मैदान पाहणेसाठी कोल्हापूरमध्ये आलेले पर्यटक भेट देत असतात. याठिकाणी पर्यटकांसाठी कुस्ती विषयक माहिती, प्रायोगिक कुस्ती खेळ प्रात्यक्षिक, मर्दानी खेळांचे प्रदर्शन, ऑन स्क्रीन कोल्हापूरचा आधुनिक इतिहास, शाहू महाराज थोडक्यात जीवन प्रवास, महाराणी ताराराणी, प्रसिध्द वास्तू, कोल्हापूरची वैशिष्टये इ.माहिती देणेचे ठराविक वेळी सुरु करणेबाबत प्रस्तावीत आहे. यामुळे पर्यटन वाढीस चालना मिळेल. ù

सीएसआर( Corporate Social Responsibility ) अंतर्गत विकास कामे –

सीएसआर फंड मधून एक सामाजिक जबाबदारी म्हणून समाजपयोगी कामे करणेत येतात. सामाजिक जबाबदारी म्हणजे समाजाप्रती असलेली जबाबदारी. आपण समाजाला काही देणे लागतो आणि समाजाला त्याचा फायदा होईल अशी कार्य या माध्यमातून केले जाते कोल्हापूर शहरांतर्गत मार्गांचे व परिसराचे सुशोभिकरण शिये टोल नाका ते पिंजार गल्ली कसबा बावडा, तावडे हॉटेल ते पंचशील हॉटेल, कोल्हापूर, ओव्हर ब्रीज ते कावळा नाका आणि कावळा नाका परिसर धैर्यप्रसाद हॉल चौक ते पितळी गणपती रस्ता.

आयसोलेशन हॉस्पीटल येथील खुली जागा विकसीत करणे.
न्यु पॅलेस परिसरातील कसबेकर पार्कमध्ये चिल्ड्रेन्स पार्क विकसीत करणे.
लोकसहभागातून रि.स.नं.382/383 येथे स्केटींग ग्राऊंड बांधण्यास परवानगी देणेबाबत
कोमनपा हुतात्मापार्क येथे ट्रॅफिक कन्सेप्ट पार्क प्रायोजक तत्वावर विकसीत करणे
कोल्हापूर महानगरपालिका कार्यक्षेत्रामध्ये रस्ता सुरक्षा जनजागृतीसाठी शहरातील सिग्नलचे ठिकाणी रस्ता सुरक्षा संबंधीचे रिफलेक्टीव्ह बोर्ड लावणेस मंजुरीबाबत.
कोल्हापूर महानगरपालिका हद्दीतील ई वॉर्ड सि.स.नं.261/1/2 पैकी आरक्षित जागा बाल पार्क विकसीत करणे.
कोल्हापूर शहरांतर्गत शिवाजी विद्यापीठ ते राजर्षी शाहू टोल नाका, कोल्हापूर या शहरांतर्गत मार्गाचे व परिसराचे सुशोभीकरण करणे.
शाहु उद्यान येथील छ.शाहू महाराज स्मारक व पाचबंगला येथील कै.भास्करराव जाधव स्मारक सुधारणा/देखभाल.

को.म.न.पा. प्रभाग क्र.38 टेंबलाई उड्डाण पुलाच्या खालील जागा विकसीत.

————

महानगरपालिकेच्या प्रस्तावीत अंदाजपत्रकामध्ये मार्गदर्शक सुचनानुसार निव्वळ महसुली उत्पन्नाच्या 5 टक्के निधी महिला व बालकल्याण कार्यक्रमासाठी, अपंग कल्याण कार्यक्रम 5 टक्के व मागास निधी 5 टक्के निधी आरक्षीत करण्यात आला आहे. मबाक निधीमधून शासनाचे इलेक्ट्रीक / सीएनजी धोरणाप्रमाणे महिलांसाठी 2 नवीन बसेस खरेदीबाबत प्रस्तावीत आहे. अत्यावश्यक व बंधनकारक आहे.